O ALCALDE DE FENE ENTREGOU ESTA NOITE O GALARDÓN AO PROFESOR DE DEREITO MERCANTIL IGNACIO VIDAL PORTABALES

No momento da entrega do premio estiveron no escenario 

(de esquerda a dereita) o Alcalde de Fene, Gumersindo Galego Feal, 

o membro do Goberno Provincial, Miguel de Santiago Boullón, 

o Secretario Xeral de Política Lingüística, Valentín García Gómez, 

a Concelleira de Cultura de Fene, Rocío Bértoa Puente e, 

en primeiro termo, o gañador da XXX edición do Premio Blanco Amor, 

Ignacio Vidal Portabales.

  Gumersindo Galego: “Asumimos o reto de organizar o Blanco Amor con ilusión, responsabilidade, compromiso e implicación”

            Coincidindo co aniversario do pasamento do escritor ourensán, a SCRD Agarimo de Sillobre acolleu esta noite a gala de entrega do XXX Premio de Novela Longa Blanco Amor, galardón que recaeu nesta ocasión no profesor da USC Ignacio Vidal Portabales pola obra titulada “Dióxenes en Dolorida”. O acto, que contou coa actuación do grupo de jazz Cool Hamsters, converteuse en punto de encontro de numerosas autoridades e representantes do tecido cultural galego. Asistiron o Director Xeral de Política Lingüística, Valentín García Gómez, o Deputado Provincial, Miguel de Santiago Boullón, alcaldes e concelleiros/as dos concellos patrocinadores e representantes do mundo da cultura. 

            Trala lectura da acta do Xurado, o alcalde de Fene, Gumersindo Galego, foi o encargado de entregar o premio ao gañador, Ignacio Vidal Portabales, a quen felicitou en nome propio e da corporación que preside. Durante a gala, fíxose costar que, logo das pertinentes deliberacións sobre as dúas novelas finalistas, o Xurado deste XXX Premio Blanco Amor declarou -por maioría-  gañadora da presente edición a novela presentada co lema “Arieira” e o título de “Dióxines en dolorida”. 

            A xuízo do xurado, “Dióxenes en Dolorida” destaca “polo esforzo de introspección nas relacións de parella desde unha determinada perspectiva que o autor asume con desenfado, pola orixinalidade na construción do personaxe protagonista como produto da inadaptación social, e pola recreación dun ambiente que flutúa entre o real e o paródico dentro dun interesante exercizo imaxinativo non exento de humor. Asemade, valorouse a eficaz estrutura compositiva da obra, así como o acerto na utilización de diferentes voces narrativas cun estilo áxil e directo”.

            DISCURSO DO ALCALDE

            “Cando hai un ano nos comunicaron que nos correspondía a organización do Blanco Amor, asumimos o reto con ilusión, responsabilidade, compromiso e implicación”, asegurou o alcalde de Fene no seu discurso. Gumersindo Galego puxo de manifesto o compromiso do Concello de Fene co conxunto da industria cultural pero, sobor de todo, “coa nosa lingua e coa nosa cultura que tan necesitadas están de iniciativas como o Blanco Amor”. 

            O primeiro rexedor fenés fixo fincapé na “responsabilidade” coa que Fene asumiu a organización do certame “nun contexto socioeconómico tan complicado para toda a poboación e tamén para os concellos” e agradeceu o apoio da corporación municipal e de toda a sociedade civil que fixo posible que este proxecto saíra adiante: Concelleira de Cultura; membros da corporación municipal; Departamento de Cultura; concellos que patrocinan esta trixésima edición; autores e autoras que presentaron as súas obras a concurso; Asociación de Escritores e Escritoras en Lingua Galega, ilustradores e ilustradoras que participaron na exposición gráfica en homenaxe a Blanco Amor; Círculo de Perlío; grupo de teatro Xosemaría Pérez Parallé do CMI Unidade de Fene e SCRD Agarimo de Sillobre.

Gumersindo Galego rematou a súa intervención facendo un chamamento aos concellos que colaboraron nesta trixésima edición para, na próxima asemblea, “repensar”  o certame. Pediu que se cambien aspectos do regulamento que quedaron obsoletos, que se estude dotalo de personalidade xurídica, mesmo dándolle cabida á industria cultural, para garantir deste xeito o seu millor financiamento e a súa estabilidade. Neste sentido, anunciou que a editorial Galaxia, representada polo conselleiro Xavier Alcalá Navarro, “ven de transmitirnos que está aberta desde este momento a a tratar cos concellos galegos a continuidade do Premio, nas condicións que se acordaren, ao entender que o Premio Blanco Amor cómpre mantelo a todo custe”.  

            ORGANIZACIÓN DO XXXI PREMIO BLANCO AMOR

            Vintecinco foron os concellos que patrocinaron esta trixésima edición do Premio de Novela Longa Blanco Amor: Oímbra, Santa Comba, Narón, Soutomaior, Redondela, Arteixo, Irixo, A Coruña, Pontevedra, Carballo, Lugo, Vigo, Mugardos, Moraña, Culleredo, Teo, Oleiros, Cabanas, Ferrol, Vilagarcía de Arousa, Neda, Ourense, Brión, Santiago de Compostela e Fene.

            No decurso da gala celebrada esta noite, realizouse o sorteo para dar a coñecer o concello organizador da vindeira edición e os dous suplentes. Segundo o Regulamento non son elixibles aqueles concellos que xa organizaran algunha edición anterior do premio nin aqueloutros que non confirmaran a súa participación na presente edición. En consecuencia, os concellos que entraron no sorteo este ano foron: Oimbra, Ferrol, Cabanas, Arteixo, Pontevedra, Carballo, Moraña e Teo.

Realizado o sorteo, correspóndelle a organización da XXXI edición ao Concello de: ARTEIXO, sendo 1º suplente o CONCELLO DE FERROL e 2º suplente o CONCELLO DE OÍMBRA.

 IMÁGENES DEL ACTO

Compartir