A rememoración
terá lugar o vindeiro venres, 23 de novembro, ás 20:30 h. nas instalacións do
Círculo de Perlío e consistirá na estrea da obra de Blanco Amor ‘O cantar dos
cantares’, a cargo do grupo de teatro Xosemaría Pérez Parallé do CMI Unidade de
Fene e baixo a dirección de Carlos Basoa.
O 10 de decembro de 1976 o Círculo de Perlío organizaba a
que, segundo Siro López, foi a única homenaxe en vida que se lle rendeu ao
xenial novelista ourensán.
No marco dos actos programados para arroupar a convocatoria
da XXX edición do Premio de novela longa “Eduardo Blanco Amor”, que este ano
lle correspondeu ao Concello de Fene, a Concellería de Cultura, en colaboración
co Círculo de Perlío e o CMI Unidade de Fene, programou a rememoración daquela
homenaxe na que o Grupo de Teatro do Círculo de Perlío representou ‘A tía
lambida’. Formaban parte daquel grupo de teatro, dirixido por Celestino Ledo,
as actrices Mabel Rivera, Elina Luaces, Mara Vargas, Carmen Edexia, Mariló
Serantes, Marga Cabrera, Mari López, Xoana Balado e María del Carmen Lorenzo e
os actores Carlos Basoa, Ramón Espada, Francisco Oti, Carlos Neira, Xoaquín
Pérez, Xosé Vicente Martínez, Valentín García, Luis Martínez, Roberto
Fernández, Xulio César González, Manolo Caldevilla, José de Bernardo e Luís
Mecías.
Dous dos que actuaron para don Eduardo, Carlos Basoa e Mari
López, regresan ao mesmo escenario, trinta e seis anos despois, desta volta
enrolados nun novo proxecto teatral, o grupo de teatro Xosemaría Pérez Parallé
do CMI Unidade de Fene, para revivir aquela homenaxe.
Dirixidos polo propio Carlos Basoa e cun cadro escénico
formado por Elisa Naveiras (no papel de Garela), Mari López (no papel de
Balbina), Manuel Novo (dándolle vida a Martiño), Carlos Basoa (como don
Marcial), José L. Acosta (Alberte), Lucía Méndez (Xulia) e María Basoa á fronte
das luces e son, estrearán a obra de Blanco Amor ‘O cantar dos cantares’.
A obra, que presenta unha síntese cultural e antropolóxica
da Galicia rural da posguerra, co caciquismo predominante naquela época, está
dividida en dúas partes con personalidade e argumentos propios sen relación
algunha. Na primeira están presentes, contos, comentarios maliciosos e
frivolidades que complican a trama sen que os homes teñan case intervención. A
seguinte, preséntanos a un crego conservador, que loita contra as novas ideas
que xa comezan a xurdir nas aldeas e que, neste caso, son protagonizadas polo
novo crego, que non aparece en escena, un estudante de medicina que ten
relación cunha rapaza que vai para costureira, e un matrimonio labrego, pais da
rapaza, que comezan estar fartos do dominio e asoballamento de don Marcial
Ao fío desta rememoración da homenaxe, o alcalde de Fene,
Gumersindo Galego Feal, manifestou: “Este
ano, no que ao Concello de Fene lle corresponde a organización da XXX edición
do Premio de novela longa “Eduardo Blanco Amor”, a programación cultural
municipal xirou sobre dúas grandes eixes de actividades. Por unha banda, as
relacionadas coa convocatoria do Premio e a súa significación no panorama
literario galego e, pola outra, as dirixidas á divulgación da vida e obra de
Blanco Amor.
E nesta liña de
divulgación, nada mellor que rememorar a única homenaxe en vida que se lle
rendeu a Blanco Amor, a que organizou o Círculo de Perlío o 10 de abril de 1976
e da que queda constancia tanto na sinatura de don Eduardo no libro de honra do
Círculo coma na dedicatoria de Xente ao lonxe que podedes consultar na
biblioteca da entidade.
Homenaxe, a de
1976, na que Siro López foi o nexo de unión entre o Círculo e Blanco Amor, e
que foi promovida pola xunta directiva
constituída por:
Presidente: Xosé L. Sánchez Vázquez
1º Vicepresidente: Manuel López Antón
2º Vicepresidente: Francisco Eibe
Caínzos
Secretario: Xosé Lamas Rivera
Vicesecretario: Xosé Herva Bouza
Tesoureiro: Xoán C. Basoa Seixo
Contador: Carlos Fernández Sanjuán
Bibliotecario: Xesús Rivera Piñón
Vocais: Xosé M. Herva López, Valentín
García Modrón, Roberto Martínez Trinquete, Carlos Fernández Domínguez e Xaime
Rivera Castro
Vaia para todas as
persoas que promoveron e participaron naquela homenaxe, para a veciñanza de
Fene que respondeu maioritariamente á convocatoria do Círculo de Perlío o noso
público recoñecemento co desexo que esta rememorización da homenaxe de 1976 a
gala de entrega do Premio de Novela que vai ter lugar o vindeiro 1 de decembro
contribúan a manter viva a nosa cultura e o legado de Blanco Amor e a nosa
cultura.”
No hay comentarios:
Publicar un comentario