Un
total de 35 poemarios compiten na XXV edición do Premio, cuxa entrega terá
lugar o vindeiro 17 de novembro nunha gala que se celebrará nas instalacións do
CMI Unidade de Fene e que contará coa actuación do Coro da rá.
O premio, convocado polo
CMI Unidade de Fene, coa colaboración do Concello de Fene e a editorial
“Espiral Maior”, naceu co obxectivo de colaborar na promoción de novas voces,
polo que os participantes non poden ter publicado ningún libro individual de
poesía, agás cando a súa edición correu por conta do autor.
Os autores e autoras
participantes tiveron que presentar un libro de poesía en lingua galega. É
responsabilidade do xurado do premio determinar se algún dos traballos
presentados posúe ou non as características para ser considerado “libro”.
Porén, nas bases recomendábase que estes poemarios teñan unha extensión mínima
de 300 versos. A composición do xurado darase a coñecer no decurso da vindeira
semana.
O premio consistirá na
edición do libro na Colección de Poesía Espiral Maior e, por vez primeira, terá
tamén unha gratificación económica de 500 € (suxeitos ás retencións impositivas
que marca a lei) e, como símbolo do premio, entregarase á persoa gañadora unha
escultura obra de Francisco Pérez Porto, artista plástico, fillo de Xosemaría
Pérez Parallé.
No hay comentarios:
Publicar un comentario