Entroido 2013 no Concello de Fene

Dezanove comparsas participarán este ano no desfile de Entroido que se celebrará no Concello de Fene o vindeiro 13 de febreiro, Mércores de Cinza e festivo local no Concello de Fene. As agrupacións que se inscribiron e que tomarán parte no día grande do Entroido fenés son: Os vampiros de Centieiras, Os zombies de Centieiras, Os colludos, Os Argalleiros, A canteira, A revolta de Trasancos, Os parrandolos, Os trasgos, Xuntanza amigos da xoldra coruñesa, Os juasaps, Escola Mario Escudero, Os Xunquiños, Carpe Diem, Woody y los vaqueros, Os seres fantásticos de Centieiras, Os scratchados, Euxa-Narón, Revuelto de frutas e O cadro flamenco de Xeriatros Ferrol. 

As actividades do Entroido 2013 no Concello de Fene comezarán xa a víspera, o martes 12 de febreiro, cunha festa infantil que se desenvolverá na Praza do Concello de 17.30 a 20.30 horas. Animará esta festa o grupo Nueva Onda (con música, luces, pompas de xabrón e a presenza -ao final- dos populares personaxes Bob Esponja e Patricio). Ademais, no descanso, ofrecerase a tradicional Degustación de Lambetadas do Entroido para todos os nenos/as participantes. 

Xa o mércores, 13 de febreiro, celebrarase o desfile e posterior festival de comparsas. As agrupacións participantes concentraranse ás 17.30 horas na rúa Río Cádavo (Perlío) e, a continuación, desfilarán -acompañadas pola Charanga Ruada- por Avda. Marqués de Figueroa, Cruce de Fene e Avenida Naturais. O percorrido finalizará na Praza do Concello onde se celebrará o Festival, coa actuación das comparsas Escola Mario Escudero, Os Xunquiños, Carpe Diem, Woody y los vaqueros, Os seres fantásticos de Centieiras e Os Scratchados.

  

A continuación procederase á lectura do testamento, á queima do boneco e á sesión de fogos de artificio. Para rematar, ao redor das 21 horas comezará o baile coa orquestra Os Satélites.