O BNG de Fene inicia unha rolda de contactos coa veciñanza para completar o seu programa electoral

Logo da aprobación, por parte da Asemblea local, das bases para a
elaboración do programa electoral o pasado venres, os nacionalistas
comezan agora unha serie de visitas polas asociacións parroquiais e
organizacións veciñais de todo tipo (culturais, deportivas,
empresariais, etc). A delegación do BNG de Fene está encabezada polo
candidato á alcaldía Juventino Trigo. Acompañarano outros membros da
candidatura nacionalista, o portavoz municipal, Manuel Polo, e a
responsábel local Ana Santiago.

A intención do BNG é dar a coñecer as liñas programáticas da
organización para as eleccións municipais, pero sobre todo, recoller
as inquedanzas das propias sociedades. Este proceso culminará a finais
do mes de febreiro cunha previsión de 20 encontros con sociedades de
todo tipo. Este martes , 1 de febreiro a delegación nacionalista
visitará a AVV de Perlío e o CPS de San Valentín.

Algunhas das nosas propostas programáticas, aprobadas pola asemblea,
pasan polas seguintes medidas:

- Retomar o impulso na formación para o emprego, posto que a
actividade dos obradoiros, intensa co anterior goberno do BNG, está
parada desde que o PSOE asumiu o poder.
- Racionalización do gasto público e cambio nos criterios de
investimento baixo o eixo da sustentabilidade.
- Garantir a concorrencia e a igualdade de oportunidades no
acceso ás contratacións, de persoal e de servizos.
- Utilización do solo empresarial dispoñíbel.
- Actuacións de promoción dos sectores produtivos (comercio,
hostalería, servizos, marisqueo)
O Concello debe retomar a reivindicación da posta en produción
da antiga Astano. A súa superficie industrial á beira do mar fai que
sexa un recurso de primeira magnitude para a revitalización da
economía da localidade.

Suscitaremos o debate sobre o modelo urbano que queremos para Fene,
que nós pensamos que debe pivotar sobre os seguintes elementos:
- O mar e á ría.
- A creatividade e a innovación na cultura e nas novas tecnoloxías.
- O respeito polo medio ambiente e a ecoloxía condicionará
calquera tipo de desenvolvemento.
- Fene é o concello dos ríos. Débense potenciar como fonte de
vida, de recursos e de lecer.
Queremos mobilizar ilusións e recursos para transformar a
realidade actual.

A elaboración do programa coas persoas como protagonistas
O BNG elaborará o programa definitivo unha vez finalizada a rolda de
reunións coa veciñanza. Esa é a nosa forma de facer política.

Despois das eleccións, o BNG pretende levar adiante unha terceira fase
deste proceso, propoñendo o acordo FENE 2020 (o deseño dun Concello de
futuro) ao conxunto dos grupos políticos, movemento asociativo, novas
entidades, agrupacións empresariais, sindicatos, etcétera

.