En bici ao colexio…

A Concellería de Medio Ambiente propón un dia sen coche para levar os nenos ao colexio. Será o vindeiro mércores, “o día sen coche”

Preténdese concienciar á xente do moito que contamina o coche, dos perxuicios para a saúde que significa facer traxectos curtos en coche e tamén da seguridade de viaxantes e de peóns

A edil de Medio Ambiente agradece o interese dos colexios de Fene e da Policia Local e de Protección Civil na iniciativa.

O vindeiro mércores 22 de setembro o Concello de Fene súmase ao Día sen coche. Para elo, a Concelleria de Medio Ambiente que dirixe Amalia García organiza a iniciativa “En bici ao colexio”. Preténdese que os pais e familiares dos nenos e nenas do Concello de Fene leven aos seus fillos, netos ou pequenos ao colexio en bicicleta ou a pé e que, por un día, abandonen o coche na casa. A policia local de Fene e Protección Civil prestarán especial atención ao tráfico rodado, preto dos colexios, intensificando máis se cabe a vixiancia, que xa se fai a diario. Asimesmo, dentro dos propios recintos escolares, poderíanse facer actividades destinadas a mellorar os coñecementos das nenas e nenos en canto á Seguridade Vial. Esta iniciativa englóbase dentro da “semana europea da mobilidade” e dentro do ciclo “Mobilidade, Saúde e Seguridade, que desenvolve a Concellería de Medio Ambiente co slogan “Móvete con intelixencia e vive mellor! A edil de Medio Ambiente espera que as veciñas e veciños se conciencien do moito que contamina o coche e o pouco que axuda a nosa propia saúde e tamén a nosa propia seguridade nas rúas.

.