A Concellería de Cultura secunda a iniciativa da Asociación de Escritores e
Escritoras en Lingua Galega e promoverá diferentes actos para a celebración
pública do ‘Día de Rosalía’, o vindeiro 24 de febreiro, data do seu nacemento.
A comemoración do ‘Día de Rosalía’,
recollida oficialmente pola Consellería de Cultura e Educacion no seu
Calendario do Libro e da Lectura, ten este ano unha especial relevancia ao se
cumprir o 150 aniversario da publicación de Cantares
Gallegos, o primeiro libro íntegro monolingüe do renacemento da nosa
literatura culta.
A
obra de Rosalía é un retrato do pobo
galego e goza dunha total actualidade. Desde o século XIX Rosalía de Castro foi
homenaxeada polas galegas e os galegos como poeta nacional. A galeguidade
intrínseca dos seus textos, a súa comunicación e entendemento permanente co seu
pobo, ao se dirixir a el no seu idioma propio, foi o que a fixo tamén poeta de
todos os pobos, chegando a formar parte da nómina de escritoras máis destacadas
da literatura universal de todos os tempos.
Por
estes motivos, a Concellería de Cultura vai facer un chamamento á comunidade
educativa e ao movemento asociativo para levar a cabo diferentes iniciativas
que permitan proxectar a figura e a obra rosaliana entre o conxunto da
poboación.
Asemade,
seguindo as propostas da AELG, convidarase
á veciñanza de Fene a agasallar un libro galego e unha flor no día do
nacemento de Rosalía de Castro.
No hay comentarios:
Publicar un comentario