A candidatura do BNG de Fene, preparada para gobernar

O BNG de Fene presenta este venres o primeiro tramo da súa candidatura ás eleccións municipais do vindeiro 22 de maio. Faino acompañado do portavoz nacional da organización, Guillerme Vázquez, que arroupará ao candidato, Juventino Trigo, na súa primeira intervención pública ante a sociedade de Fene.

O acto, aberto ao público, celebrarase este venres, 11 de marzo, ás 20 horas, no Círculo Cultural Recreativo e Deportivo de Perlío. Durante o desenvolvemento do mesmo, proxectarase un vídeo elaborado coas intervencións de 17 persoas representativas de todos os ámbitos da sociedade de Fene. Entre todas, conforman un retrato da actualidade do municipio e das súas principais demandas. Haberá tamén música e uns petiscos para todos/as ao remate do acto.

Trátase da primeira vez que o candidato do BNG, Juventino Trigo, realiza unha intervención pública ante toda a sociedade xa que, ata o de agora, a candidatura nacionalista mantivo reunións privadas con todo o movemento asociativo do concello co obxectivo de recoller ideas e demandas para o programa electoral. Unhas reunións que están a ter uns resultados moi satisfactorios.

No acto repartiranse exemplares do novo boletín do BNG de Fene e presentaranse tamén as persoas da candidatura que completan o tramo dos cinco primeiros.

No número dous sitúase Rita Couto, que fora concelleira de Benestar Social e Igualdade no periodo 2007-2009 e que conta, entre os seus méritos, coa posta en marcha da primeira Galescola de Fene, o servizo Xantar na Casa ou o Centro de Atención á Muller. Séguea na lista o tamén ex concelleiro Manuel Polo, que se ocupara naquel entón da área de Promoción Económica e Emprego, con gran nivel de actividade. E no catro, outra das persoas con experiencia na xestión municipal: Inés Roca, que foi quen de destacar entre toda a sociedade como concelleira de servizos e mantemento. O número cinco é para o segundo independente da lista –despois do propio candidato-; trátase de Xusto Martínez Ardá, un rapaz novo, arquitecto técnico de profesión, e moi integrado e activo na sociedade. Foi fundador da sociedade deportiva As Píntegas, membro varios anos da comisión de Festas de Fene, e é xogador do Barallobre de fútbol.

Perfil do candidato

Juventino Trigo é veciño de Perlío e naceu en 1962. Foi aprendiz de ASTANO e traballou no estaleiro ata 1987, ano no que se puxo á fronte da Asesoría Perlío, que dirixe na actualidade. É Graduado Social pola Universidade de Santiago (Seminario de Ferrol), Técnico Superior en Prevención de Riscos Laborais, e actualmente saca tempo para cursar a licenciatura en Ciencias do Traballo pola Universitat Oberta de Catalunya. Ligado desde moi novo ao movemento sindical e ao ideario nacionalista, Juventino Trigo é un profesional da xestión con moitas cualidades para pórse á fronte do goberno municipal.

.